Kultur ekintzak

Urte osoan, kultur ekintzek lurraldean artista eta obra anitz egotea bultzatzen dute.

Gure kultur denboraldiko funtsezko osagaiak dira.

Kultur ekintza mota desberdinak badira

Arte eta Kultura Heziketa proiektuak lurraldeko kultura politikaren zutabeetarik bat dira.
Eta AKH proiektuek hiru ardatz dituzte:

• Topaketak: bi artelan ikustea
• Praktika: ikasgelan arte diziplina bat praktikatzea, artista edo profesional baten laguntzarekin
• Ezagutza: ikasgelan esperientzia horri buruz eztabaidatzea, hezkuntza ibilbidearen parte den ikuskizunaren edo tailerren ondotik

Proiektu horiek zinezko ezagutzak biltzeko parada dira.
Arte diziplina guzien inguruan antolatzen dira.
Aitzineko ikasturteko apiril edo maiatzean, irakasleak, artistak eta kultura garapeneko arduradun batek elkarrekin eraikitzen dituzte.

Arte eta Kultura Hezkuntzako proiektuak muntatzen dituzten ikastaldeek lehentasuna dute ikuskizunen ikasleendako emanaldiak erreserbatzeko, bereziki toki mugatuak direlarik.

2023-2024ko heziketako proiektuak

Argibideak: Julie Bercetche / Ikuskizun biziaren zerbitzua / j.bercetchecommunaute-paysbasque.fr

Haurtzaroko eta gaztaroko profesionalei –irakasle, animatzaile, haurtzain, gazte bulegoetako langile eta abarrei– zuzendutako topaketa- eta ikaskuntza-momentuak dira formakuntzak. Tresna praktikoez eta oinarrizko ezagutzez jabetzeko ahala ematen dute, taldea ikuskizun bat ikustera joateari sentsibilizatzeko.

Formakuntza bi alditan iragaten da:

• Lehen denbora batean, irakasleak tailer praktikoak proposatzen ditu: irakasleak tailerra aitzinetik probatzen du, ikasleei gelan proposatu baino lehen.
• Bigarren denbora batean, ikuskizunari buruzko ekarpen teorikoa ematen du, ikuskizunak lantzen duen gaiari edo ikuskizun biziaren alor bati buruzkoa.

Saioak astearte arratsaldeetan edo asteazkenetan antolatzen dira, ikuskizun bat edo gehiagoren inguruan, eta saio horietan parte hartzen dute ikuskizun biziko profesionalek, pedagogia aholkulariek, artistek, irakasleek eta abarrek.

2023-2024ko formakuntzak honako ikuskizun hauen inguruan eskainiko dira:

• L'Eau douce
  • Nathalie Pernette L’Eau douce ikuskizunaren taula zuzendari eta koreografoak formakuntza segituko duten eskolako irakasle eta aisialdi zentroetako animatzaileak akuilatuko ditu urak gorputzean, soinuan edo teatro pusketan izan ditzakeen aldaketak aztertzera.
• Xana eta sudur gorri magikoa
  • Eneka Bordato Riano Xana ikuskizunaren taula zuzendari eta koreografoak emozioei buruzko eta gorputzaren eta dantzaren bidez zentzumenak pizteari buruzko euskarazko formakuntza hau animatuko du.
• Eclipse et coquelicot
  • Formakuntza honek “gorputz kameleoiaren” gaia aztertuko du. Mickaël Vivier artista plastiko eta ESAPB arte eskolako irakasleak eta Jean-Philippe Mercé Bordeleko Akademiako arte plastikoetako pedagogia-aholkulariak motiboa eta kamuflajea ikertuko dituzte artearen historian eta sorkuntza garaikidean.
• Une forêt eta Le joueur de flûte
  • Félicie Artaud Une Forêt ikuskizunaren idazle eta taula zuzendariak ipuinen berridazketari buruzko formakuntza hau animatuko du.
• Les Petits Touts eta Vida
  • Mouka konpainiako Marion Gardie antzezle eta taula zuzendariak irakasleei aurkeztuko dizkie objektu-antzerkiaren eta txotxongiloen oinarrizko printzipioak, tailer praktikoen bidez.
  • Bisita gidatua antolatuko da Topic Museora, Tolosako Nazioarteko Txotxongilo Jaialdiaren karietara, alor horren historia eta adierazpideak ezagutzeko.
• Une forêt, Le joueur de flûte eta Là-bas
  • Antzerkiaren oinarrizko ariketak diren jokoaren eta inprobisazioen bidez, Claire Grimbert Là-bas ikuskizunaren idazle eta taula zuzendariak animatzaileei pista batzuk proposatuko dizkie haurrek ikusitako ikuskizunak uler eta azter ditzaten.
• Du vent dans les plumes
  • Volubilis konpainiako Agnès Pelletier Du vent dans les plumes ikuskizunaren taula zuzendari eta koreografoak formakuntza segitzen duten irakasleak akuilatuko ditu dantza garaikidearen oinarriak aztertzera.

Argibideak: Johanna Selinger / Ikuskizun biziaren zerbitzua / j.selingercommunaute-paysbasque.fr

Topaketak ikasgelan

Noiztenkako ekintza honen bidez, ikastalde bat sentsibilizatzen da ikuskizun bat ikustera joateari.

“Topaketak ikasgelan”, izenak dioen bezala, ikastetxeetan antolatzen den ekintza bat da. Orduan, arte eszenikoetan lantzen diren sorkuntza edo gai orokorragoei buruz solasean aritzen dira parte hartzaileak eta ikasleak.

Topaketa horietan, ikasleek ikuskizun bat ezagutzen dute, kultura-sektoreko lanbideak ezagutzen dituzte edo obra bat sortzeko prozesuaren etapak ulertzen dituzte. Ondorioz, emanaldi egunean, aktiboki entzuteko eta ikusi eta sentitu dutena ulertu eta aztertzeko gai dira.

Ikasgelako topaketetan emanaldi bat antola daiteke ere, ikasleei beren azterketan laguntzeko. Orduan, agertokian aipatu diren gaiak lantzen dira, sor daitezkeen galdera, zalantza edo ez ulertzeei erantzuten zaie eta gazteei beren azterketa kritikoa egiten laguntzen zaie.

Aurten, ikasgelako topaketak ikuskizun hauen inguruan antolatuko dira:

• Là-Bas
• Lur
• La Langue des Cygnes

Alderdi anitzeko sentsibilizazio ekintzak antolatuko dira ikuskizun hauen inguruan:

• Playground : Konpainiaren eta ikasgelaren arteko korrespondentzia digitala eta desafio ludikoak, ikuskizuna ikustera joan aitzin. Ikasgelan ikuskizunaren afixa sortzea, eta afixa hura emanaldiaren lekuan afixatzea.
• BONOBO : “Seinale-kutxa” bat, ikuskizuna ikustera joan baino lehen ikasgelan argitu beharreko seinaleak biltzen dituena, eta emanaldiaren egunean agertoki bazterrean konpainiako artistek aurkeztuko dutena. Ikasgelan ikuskizunaren afixa sortzea, eta afixa hura emanaldiaren lekuan afixatzea. Bonobo ikuskizunaren jatorrizko 19 marrazkien erakusketa Donapaleuko mediatekan.

Bitartekaritzarako euskarria

Kultura-denboraldiko ikuskizun bakoitzerako, irakasleei laguntza-dosier bat eta ikasleei “ikusle gaztearen liburuxkak” eskaintzen zaizkie, obra hobeki ulertu eta aztertzen laguntzeko. Bitartekaritzarako euskarri horiek artisten asmo eta praktikak ezagutu, aipatu, ulertu eta ikertzeko ahala ematen dute, baita ikuskizun biziaren artea, ikuslearen rola eta obraren harrera emozionala aztertzeko ere.

Argibideak: Marie Bonnet / Ikuskizun biziaren zerbitzua /  m.bonnetcommunauté-paysbasque.fr